Agentlik yarandığı gündən etibarən beynəlxalq əməkdaşlığa xüsusi diqqət ayırıb və bir sıra ölkələrin tənzimləyici qurumları ilə ikitərəfli və çoxtərəfli əlaqələrin gücləndirilməsi yolunda əhəmiyyətli işlər görüb, bu qurumlarla mütəmadi olaraq təcrübə mübadiləsi aparıb.
Azərbaycan Respublikasında tənzimlənən sahədə tənzimləmə mexanizmlərinin tətbiq edilməsi, yerli qanunvericiliyin müasir tələblərə uyğunlaşdırılması məqsədilə, Avropa Yenidənqurma və İnkişaf Bankı və Energetika Nazirliyi arasında Enerji Məsələlərini Tənzimləmə Agentliyinin fəaliyyətinə dəstək layihəsinə dair 2017-ci ilin sentyabrında Niyyət Protokolu imzalanıb. 2018-2021-ci illər ərzində davam etmiş "Azərbaycan Respublikasında yeni yaradılmış Enerji Məsələlərini Tənzimləmə Agentliyinin fəaliyyətinə dəstək" layihəsi çərçivəsində enerji tənzimləmə sahəsində normativ hüquqi akt layihələrinin hazırlanması, həmçinin Agentliyin əməkdaşlarının kadr potensialının artırılması istiqamətində EBRD tərəfindən dəstək göstərilib.
Növbəti addım olaraq Enerji Tənzimləyicilərinin Regional Assosiasiyası (ERRA) ilə işgüzar əlaqələr yaradılıb və 2018-ci ilin aprel ayından qurumun assosiativ üzvü seçilib. Bu əməkdaşlıq enerji tənzimləmə sahəsində beynəlxalq təcrübənin paylaşılması və bir çox ölkənin tənzimləyici qurumları ilə əməkdaşlıq əlaqələrinin qurulmasına töhfə verməkdədir.
Agentlik Avropa Enerji Tənzimləyiciləri Şurası (CEER), Avropa Yenidənqurma və İnkişaf Bankı (EBRD), Asiya İnkişaf Bankı (ADB), eləcə də Tənzimləyici Enerji Keçidi Akseleratoru (RETA) platforması ilə də sıx əməkdaşlıq edir.
Beynəlxalq təcrübənin öyrənilməsi məqsədilə əməkdaşlıq əlaqələrini inkişaf etdirən Agentlik 2020-ci ildə Türkiyə və Bolqarıstanın enerji məsələləri üzrə tənzimləyiciləri ilə əməkdaşlıq haqqında protokollar imzalayıb.
2021-ci ildə Ukrayna, İsrail və Böyük Britaniyanın (Ofgem) enerji tənzimləyiciləri ilə əməkdaşlığın təməlini qoyub. Qurumlar arasında elektrik enerjisi və təbii qaz təchizatı sahəsində dayanıqlı tənzimləmə bazasının yaradılmasına, tənzimlənən sahədə bazarların inkişafı üçün seminarlar, ikitərəfli görüşlər, təlimlər, mütəxəssis və təcrübə mübadiləsinin aparılmasına dair razılığa gəlinib.
2021-ci ildə Agentlik Macarıstanın Enerji və Kommunal Tənzimləmə Qurumu (MEKH), 2023-cü ilin aprel ayında Avstriyanın enerji tənzimləyici qurumu "E-Control", 2024-cü ilin fevral ayında isə Gürcüstanın Milli Enerji və Su Təchizatı Tənzimləmə Komissiyası (GNERC) ilə əməkdaşlığa dair Anlaşma Memorandumları imzalayıb.
2021-2024-cü illəri əhatə edən “EU4Energy” proqramının II mərhələsi - “Şərq Tərəfdaşlığı ölkələrində təmiz enerjiyə keçidin təşviqi” layihəsi çərçivəsində də əməkdaşlıq fəaliyyəti həyata keçirilir.
Agentliyin əməkdaşlıq etdiyi beynəlxalq qurumlar
Enerji Tənzimləyicilərinin Regional Assosiasiyası (ERRA)
Enerji Birliyi (Energy Community)
Avropa Enerji Tənzimləyiciləri Şurası (CEER)
Avropa Yenidənqurma və İnkişaf Bankı (EBRD)
Asiya İnkişaf Bankı (ADB)
Tənzimləyici Enerji Keçidi Akseleratoru (RETA)
