Elektrik şəbəkəsinə qoşulma

Əhali qrupuna aid istehlakçıların mövcud və ya inşa ediləcək tikinti obyektlərinin (tələb olunan gücü 200 kVt-a qədər (200 kVt daxil olmaqla 0,4 kV-luq şəbəkədən) elektrik şəbəkəsinə qoşulma qaydası və müddəti Azərbaycan Respublikası Nazirlər Kabinetinin 2024-cü il 25 iyun tarixli 315 nömrəli Qərarı ilə təsdiq edilmiş “Elektrik şəbəkəsinə dair Qaydalar” ilə müəyyən olunur.

Elektrik şəbəkəsinə qoşulmaq üçün müraciət

Əhali qrupuna aid istehlakçılar mövcud və ya inşa ediləcək tikinti obyektlərini elektrik enerjisi (gücü) ilə təmin etmək üçün "ASAN xidmət", "ASAN Kommunal", kiçik və orta biznes evlərinə (KOB evləri) və ya elektron hökumət portalı vasitəsilə müraciət edə bilərlər.

Tikinti obyektlərinin elektrik şəbəkəsinə qoşulması üçün tələb olunan məlumatların (sənədlərin) siyahısını bu linkə daxil olaraq əldə edə bilərsiniz.

Qoşulma xidmətinə görə ödəniş məbləğləri

Tikinti obyektlərinin elektrik şəbəkəsinə qoşulma xidmətinə görə ödəniş məbləğləri Azərbaycan Respublikasının Tarif Şurasının 03 may 2024-cü il tarixli 4 nömrəli Qərarı ilə müəyyən olunur.

İşğaldan azad edilmiş ərazilərdə elektrik şəbəkəsinə qoşulma xidmətinə görə ödəniş məbləğləri Azərbaycan Respublikasının Tarif Şurasının 03 may 2024-cü il tarixli 4 nömrəli Qərarına əlavə edilmiş 1-1-ci hissə ilə aşağıdakı kimi müəyyən edilmişdir:

• 1-1.1. Qərarın 1-ci hissəsi ilə təsdiq edilmiş Əlavənin 1.1-ci, 1.2-ci, 2.1-ci və 2.2-ci sətirləri üzrə — ödənişsiz;
• 1-1.2. Qərarın 1-ci hissəsi ilə təsdiq edilmiş Əlavənin 1.3-cü sətri üzrə — 102,55 manat.

Elektrik sayğacının quraşdırılması

Əhali qrupuna aid istehlakçının elektrik sayğacı ilə təmin olunması enerjitəchizat müəssisəsinin vəsaiti hesabına təchiz edilir, quraşdırılır və dəyişdirilir.

Yaşayış binalarının elektrik şəbəkəsinə qoşulması üçün ümumi texniki şərtlərin verildiyi və həmin texniki şərtlərin tələblərinin icra olunduğu nəzərə alınaraq, həmin binalarda yerləşən mənzillərin elektrik şəbəkəsinə qoşulması üçün ayrıca texniki şərtlərin və layihə sənədlərinin alınması, həmçinin qoşulma xidmətinə görə ödəniş tələb olunmur.

Qaz təchizatı şəbəkəsinə qoşulma

İstehlakçıların tikinti obyektlərinin qazpaylayıcı şəbəkəyə qoşulması Azərbaycan Respublikası Nazirlər Kabinetinin 22 iyun 2026-cı il tarixli 189 nömrəli Qərarı ilə təsdiq edilmiş “Qaz təchizatı sisteminə dair Qaydalar” ilə müəyyən edilir.

Tələb olunan məlumatlar

Ərazi planlaşdırılması sənədləri təsdiq edilmiş ərazilərdə məişət qaz qurğuları quraşdırılan tikinti obyektlərinin mövcud qazpaylayıcı şəbəkəyə texnoloji qoşulması məqsədilə texniki şərtlərin və qaz təchizatı layihəsinin hazırlanması və verilməsi üçün sifarişçidən “İnzibati icraat haqqında” Azərbaycan Respublikası Qanununun 29-cu və 30-cu maddələrinə uyğun olaraq, aşağıda qeyd olunan məlumatlar tələb olunur:

• Ərizə (elektron və ya yazılı formada);
• Sifarişçinin şəxsiyyətini təsdiq edən sənədin FİN nömrəsi;
• Sifarişçinin qazpaylayıcı şəbəkəyə qoşulması nəzərdə tutulan tikinti obyektinin və ya tikinti obyektinin yerləşdiyi (yerləşəcəyi) torpaq sahəsinin ünvanı (olduğu yer) və həmin tikinti obyekti və ya tikinti obyektinin yerləşdiyi (yerləşəcəyi) torpaq sahəsi üzərində sifarişçinin mülkiyyət və ya digər əşya hüququnu təsdiq edən sənəd barədə məlumatlar (daşınmaz əmlakın dövlət reyestr nömrəsi və daşınmaz əmlakın qeydiyyat nömrəsi) və ya həmin sənədin skan olunmuş surəti (həmin məlumatların Elektron Hökumət İnformasiya Sistemi vasitəsilə əldə edilməsi mümkün olmadığı hallarda);
• Tələb olunan qazın ümumi saatlıq buraxılış həcmi;
• Sifarişçinin mobil telefon nömrəsi, poçt və elektron poçt ünvanı (elektron poçt ünvanı olduqda).

  ---

  Müddət

Tikinti obyektinin qazpaylayıcı şəbəkəyə qoşulması onun sifarişçisinin müraciət etdiyi tarixdən etibarən 20 (iyirmi) gündən gec olmayaraq təmin edilir.

Mənbə: Azərbaycan Respublikasının Tarif (Qiymət) Şurasının “Tikinti obyektlərinin qazpaylayıcı şəbəkəyə qoşulma xidmətinə görə ödəniş məbləğlərinin tənzimlənməsi barədə” 3 may 2024-cü il tarixli 5 nömrəli Qərarı

Azərbaycan Respublikası Nazirlər Kabinetinin 22 iyun 2026-cı il tarixli 189 nömrəli Qərarı ilə təsdiq edilmiş “Qaz təchizatı sisteminə dair Qaydalar”ın 58.4-cü yarınbədinə əsasən məişət istehlakçılarının məişət qaz qurğuları quraşdırılan və texniki şərtlərlə müəyyən edilmiş ümumi saatlıq buraxılış qaz həcmi saatda 10 kubmetrədək olan tikinti obyektləri üçün sayğaclar müvafiq sistem operatorunun vəsaiti hesabına, digər istehlakçılar üçün isə sayğaclar istehlakçının vəsaiti hesabına müvafiq sistem operatoru tərəfindən təchiz edilir, quraşdırılır və dəyişdirilir.

İstilik enerjisi təchizatı şəbəkəsinə qoşulma

Əhali qrupuna aid istehlakçılar istilik enerjisi təchizatı şəbəkəsinə qoşulmaq üçün "Azəristiliktəchizat" ASC-nin baş ofisinə (Bakı şəhəri, Xətai rayonu, Xudu Məmmədov küçəsi 3) ərizə ilə müraciət etməlidir. 

• Ərizə - Sənədin skan edilmiş surəti (elektron müraciət edildikdə) və ya əsli (şəxsən və ya poçt xidməti vasitəsilə müraciət edildikdə);
• Daşınmaz əmlak üzərində mülkiyyət hüququnu təsdiq edən sənəd - Sənədin skan edilmiş surəti (elektron müraciət edildikdə) və ya əsli  (şəxsən və ya poçt xidməti vasitəsilə müraciət edildikdə);
• info@azeristiliktechizat.az