“İnsan resurslarının əsas işi insan kapitalıdır”

“Karyera bloqu” rubrikasında müsahibimiz Enerji Məsələlərini Tənzimləmə Agentliyinin (EMTA) müşaviri Afət Rzayevadır.

Afət Rzayeva ilk əmək fəaliyyətinə universitet illərindən beynəlxalq təşkilatlarda ingilis-rus-Azərbaycan dilləri üzrə tərcüməçi, baş tərcüməçi kimi başlayıb. Sonra karyerasını neft-qaz sektoru üzrə qlobal, çoxmilli korporasiyada davam etdirib. İnsan resurslarının idarə edilməsi sahəsinə marağı da məhz həmin vaxtda başlayıb. O, insan resursları (İR) üzrə sertifikasiya proqramlarında uğurlar qazanıb. 2000-ci illərdə İR idarəetmə standartlarının Azərbaycanda ilk yarandığı dövrdə həyata keçirilən kadr kargüzarlığından insan kapitalına keçid çərçivəsində Xəzər regionu üzrə İR rəhbər vəzifəsinə layiq görülüb. “Hay” dərəcələndimə sistemi, “SuccessFactors” qiymətləndirmə və karyera planlaması sistemi, “Aon Hewitt” işçi motivasiya sistemi və bu kimi layihələrin həyata keçirilməsində iştirak edib. Amerika Birləşmiş Ştatları, Sloveniya, Türkiyə və Rusiya kimi ölkələrdə peşəkar inkişaf proqramlarına  yiyələnib.

EMTA-da əmək fəaliyyətinə 2022-ci ildə İnsan resursları şöbəsinin müdiri kimi başlayan A.Rzayeva hal-hazırda müşavir vəzifəsində fəaliyyətini davam etdirir.

Afət xanım, uzun müddət insan resursları sahəsində iş təcrübəniz var. Sizcə, işəgötürənlər üçün işçi seçimi zamanı əsas faktorlar nələrdir?

Standartlar və qəbul edilmiş kriteriyalardan danışsaq, işəgötürənlər üçün əsas amillər kimi bunları qeyd edərdim: təhsil, şəxsiyyət və xarakter, mühakimə qabiliyyəti, məsuliyyət, çalışqanlıq, təşəbbüskarlıq, etik davranış, komanda ruhu, bilik və bacarıq. Bu, ideal komanda yoldaşı - işçi portretidir. Amma hər bir şirkətin hədəflərinə və ehtiyaclarına bağlı meyarlar var. Ümumiyyətlə, insan kapitalının idarə edilməsində vahid yanaşma, eyniləşdirmə yoxdur. Yanaşma adaptiv olmalıdır. 

İş yerində əməkdaşlar arasında daxili kommunikasiyanın yaxşılaşdırılması üçün hansı addımlar atılmalıdır?

Effektiv daxili kommunikasiya informasiyanın yayımlanması ilə yanaşı,  həmçinin əks əlaqə və dialoqu təşviq etməkdir. Burada ikitərəfli ünsiyyətin təşviqi vacibdir: işçilərə suallar ünvanlamaq, təkliflər vermək və fikirlərini bölüşmək imkanı yaradan kanal və platformalar təqdim etmək, onları dinləmək əhəmiyyətlidir. EMTA-da bu yanaşmaya rəhbərlik tərəfindən böyük diqqət yetirilir, vəzifəsindən, şəxsi və ya işgüzar mövzuda olmasından asılı olmayaraq işçilər problemlərini İdarə Heyətinin sədri ilə rahat bölüşə bilirlər. Yəni, “pilləli müraciət” deyil, “açıq qapı” prinsipinə üstünlük verilir. Əlavə addımlara gəldikdə, şöbələrarası əməkdaşlığın gücləndirilməsi vacibdir. Şöbələr arasında əməkdaşlıq və məlumat mübadiləsinin təşviqi, bilik mübadiləsi, birgə təlim,  seminar və görüşlərin mütəmadi olaraq  təşkili, əməkdaşların qazandıqları nailiyyətlərin qeyd edilməsi daxili kommunikasiyada faydalıdır. 

İnsan seçimi hər zaman çətindir - həyatda da, işdə də. İşəgötürənlər üçün bu seçimi aparmaq insan resurslarının öhdəsinə düşür. Sizin fikrinizcə, seçimi aparan insan resursları strukturunun əməkdaşı özü hansı meyarlara cavab verməlidir? 

İnsan resurslarının əsas işi insan kapitalıdır. İnsan resursları strukturunun əməkdaşı  işəgötürən və işçi arasında münasibətləri balanslaşdırmağı bacarmalı, təşkilatın məqsəd və strategiyasını bilməli, detallara diqqətcil olmalı, hər zaman öz üzərində çalışmalı, nəticəyönümlü olmalıdır.

Bu sahədə karyera qurmaq istəyənlərə hansı tövsiyələriniz var?

Qarşılarına qoyduqları məqsədə çatmaq üçün  bilik və bacarıqlarını daim inkişaf etdirsin, yeniliklərə açıq olsun və məsuliyyətdən qaçmasınlar. Verilən dəstəyi doğru qiymətləndirsinlər, gələcəkdə öz biliklərini onlardan sonra gələn komanda yoldaşları ilə paylaşsınlar.